Клиникалық өлімдегі науқасты құтқарды

«Асиямед» клиникасына жедел миокард инфарктісі диагнозымен ауыр жағдайда науқас жеткізілді. Түскен сәтінде пациент клиникалық өлім жағдайында болды. Реанимациялық шаралар шұғыл түрде жүргізіліп, нәтижесінде жүрек соғысы қалпына келтірілді.

Науқасқа шұғыл түрде коронарография жасалып, жүрек тамыры ашылып, стент орнатылды. Бұл іс-шаралар МӘМС есебінен жасалды. Ота барысында және одан кейін бірнеше рет жүрек тоқтауы тіркелгенімен, медициналық персоналдың жедел әрекетінің арқасында науқастың өмірі сақталып қалды.

Пациент шамамен он күн бойы жансақтау бөлімінде бақылауда болып, жағдайы тұрақталғаннан кейін жалпы палатаға ауыстырылды. Қазіргі таңда науқастың жағдайы жақсы, ол дәрігерлердің қатаң бақылауында.