NewsHub.kz - Информационный хаб

МӘМС жүйесі жинақтаушы қор емес

20 Jan, 11:12
7 mins read
856
МӘМС жүйесі жинақтаушы қор емес
МӘМС

2024 жылдың 12 айында Түркістан облысының денсаулық сақтау жүйесін қаржыландыру мәселесі және МӘМС жүйесі негізінде атқарылған жұмыстар жөнінде «Әлеуметтік медициналық сақтандыру қоры» КЕАҚ Түркістан облысы бойынша филиалы директорының м.у.а. Бағлан Тілектеске бірқатар сұрақтар қойған едік.

- Қайырлы күн, Бағлан Базарбекұлы! МӘМС  жүйесіне қандай қызметтер кіреді?

- МӘМС жүйесі жинақтаушы Қор емес. Бұл – жарналар мен аударымдардың мөлшеріне қарамастан пациенттердің МӘМС медициналық қызметтеріне толықтай алуына байланыстыр қалыптастырылған әлеуметтік жүйе.

МӘМС жүйесінде сақтандыру мәртебесі жоқ пациенттер ТМККК тізбесіне кіретін медициналық көмекті алуына болады. МӘМС жүйесінде мәртебесі болмаған соң, жүйедегі қызметтерді алмайды.

МӘМС жүйесінде сақтандырылған адамдар міндетті әлеуметтік медициналық сақтандыру ұсынатын медициналық көмектің кеңейтілген спектріне ие болады.

МӘМС келесі медициналық қызметтерді қамтиды:

-профилактикалық медициналық тексерулер;

-учаскелік дәрігердің нұсқауы бойынша арнайы маманданған дәрігердің қабылдауы және кеңес беруі;

-созылмалы дертке шалдыққан жандардың бейінді мамандардың бақылауында болуы;

-уәкілетті орган бекіткен тізбе бойынша халықтың жекелеген санаттарына шұғыл және жоспарлы нысанда стоматологиялық көмек көрсету;

-халықтың белгілі бір категориясына шұғыл және жоспарлы түрде стоматологиялық көмек көрсету;

-диагностикалық қызметтер, оның ішінде лабораториялық диагностика (УЗИ, рентген, КТ, МРТ);

-мамандандырылған, оның ішінде жоғары технологиялы, стационарлық медициналық көмек;

-медициналық оңалту;

-стационарда мамандандырылған медициналық көмек көрсету кезінде дәрі-дәрмекпен қамтамасыз ету.

- Сақтандырылмаған адамдар қандай медициналық көмектерді алады?

- Тегін медициналық көмектің кепілдендірілген көлемі төмендегі қызметтерді қамтиды:

-жедел медициналық жәрдем, оның ішінде медициналық авиация;

-алғашқы медициналық-санитарлық жәрдем, оның ішінде диагностика, емдеу, профилактикалық тексерулер, жұқпалы дерт ошақтарында санитарлық және эпидемияға қарсы және де санитарлық-профилактикалық шаралар жүргізу;

-амбулаториялық жағдайдағы мамандандырылған медициналық жәрдем, оның ішінде вич жұқпасы мен туберкулездің алдын алу және диагностика, шұғыл жағдайда көрсетілетін қызметтер, әлеуметтік маңызы бар және созылмалы аурулардың диагностикасы және емдеу;

-стационарды алмастыратын жағдайдағы мамандандырылған медициналық жәрдем, оның ішінде  әлеуметтік маңызы бар және созылмалы ауруларды емдеу; үйдегі стационар қызметтері;

-стационарлық жағдайдағы мамандандырылған медициналық жәрдем, оның ішінде өзге адамдарға қауіп төндіретін жұқпалы және паразитарлық ауруларды емдеу және жұқпалы немесе паразитарлық дертке шалдықты деген күдікпен жатқан науқастарды емдеу;

-паллиативті медициналық көмек;

-мамандандырылған медициналық көмек көрсету кезінде медициналық көрсетілімдер болған жағдайда қан препараттарымен және оның компонеттерімен қамтамасыз теу;

-амбулаториялық, стационарды алмастыратын және стационарлық жағдайларда мамандандырылған медициналық көмек көрсету кезіндегі патологиялық – анатомиялық диагностика;

-Қазақстандықтарды шетелге емделуге жіберу және отандық медициналық ұйымдарда емделу үшін шетелдік мамандарды тарту;

-дәрі-дәрмекпен қамтамасыз ету, оның ішінде медициналық бұйымдар, жедел және мамандандырылған жәрдем беру кезінде қолданылатын иммунобиологиялық дәрілік заттар, амбулаториялық жағдайда қарсы профилактикалық екпелер жасалып, мамандандырылған медициналық жәрдем көрсетілетін аурулар тізіміне сәйкес алғашқы медициналық-санитарлық көмек.

-Түркістан облысының денсаулық сақтау жүйесін қаржыландыру мәселесі тоқталсаңыз?

-2024 жылға Түркістан облысының денсаулық сақтау саласына бекітілген бюджет – 235,9 млрд теңге. Бұл өткен жылмен салыстырғанда 10,3 пайызға артық (2023 жыл – 211,7 млрд тг нақты бюджет). Яғни, медицинаны қаржыландыру сәйкесінше, жыл сайын артып отыр.

Қор Түркістан облысының тұрғындарына сақтандыру пакеті жүйесі көрсетілетін қызметтерге 117,7 млрд. теңге қараған болса, оның ішінде, стационарлық көмекке шамамен 35,6 млрд. теңге, консультациялық-диагностикалық көмекке – 39,9 млрд теңге, амбулаториялық дәрі-дәрмекпен қамтамасыз етуге - 15 млрд теңге, жоғары технологиялық медициналық көмекке - 1,0 млрд. теңге және медициналық оңалтуға - 7,6 млрд. теңге қарады.

Кепілдендірілген тегін медициналық көмек пакеті бойынша көрсетілетін қызметтерге 118,2 млрд. теңге, оның ішінде, жедел медициналық көмекке 11,0 млрд. теңге, медициналық-санитариялық алғашқы көмек – 60,1 млрд. теңге, ауыл халқына тәуліктік және күндізгі стационарлық лот бойынша мамандандырылған медициналық көмек - 11,9 млрд. теңге, инфекциялық ауруларға - 1,3 млрд. теңге, онкологиялық науқастарға – 6,5 млрд. теңге қаралды.

2025 жылға бюджет сомасы 216,4 млрд. теңге шамасында бекітілді.Медициналық көмек көрсету бойынша денсаулық сақтау субъектілерінен көрсетілетін қызметтерді сатып алу қағидалары бойынша Веб-ортал Сатып алу рәсіміне 203 медициналық ұйымнан өтініш түсті.

Қаражаттың көлемдерін бөлу, денсаулық сақтау субъектілері қызметінің индикаторларын есептеу және рейтингтік бағалау әдістемесін қолдана отырып, өңірлік комиссияның шешімімен 196 медициналық ұйыммен келісімшарт жасалды.Ағымдағы жылға келісімшарттың 19 млрд.теңге шамасында алдын ала төлем (аванс) медициналық ұйымдардың есепшоттарына аударылды.

   

- 2025 жылы МӘМС үшін қанша төлейміз?

-МӘМС төлемдері бойынша ставкалар өзгеріссіз қалды. Дербес төлеушілер мен жеке кәсіпкерлерге жарналарды есептеу үшін ең төменгі жалақы есепке алынады. Биыл ол бұрынғы деңгейде қалды, яғни 85 000 теңге. Демек, жарналар мөлшері де өзгермейді.

Сонымен, 2025 жылы МӘМС үшін кім қанша төлейтінін еске салсақ:

• Жұмыс берушілердің аударымдары — қызметкердің табысынан 3%;

• Қызметкерлердің жарналары — табыстың 2%-ы;

• Азаматтық-құқықтық шарттар бойынша жұмыс істейтін жеке тұлғалардың жарналары — табыстың 2%-ы;

• Жеке кәсіпкерлердің, жеке практикамен айналысатын тұлғалардың жарналары — айына 5 950 теңге;

• Дербес төлеушілердің жарналары — айына 4 250 теңге.

Биыл тек біржолғы төлем мөлшері 21,5%-дан 23,8%-ға дейін өзгереді.

МӘМС жарналарын «Қазпошта» АҚ және екінші деңгейлі банктердің кассалары, жылдам төлем терминалдары әрі банктердің мобильді қосымшалары арқылы төлеуге болады.

-Жеңілдік санатқа кімдер кіреді және қандай медициналық қызметтерді алуға мүмкіндіктері бар?

-Қазақстандағы МӘМС жүйесі әлеуметтік болғандықтан мемлекет 15 жеңілдік санатына кіретін азаматтар үшін жарналарды төлеуді жалғастыруда. 2025 жылы мемлекеттің бір азаматқа төленетін жарнасы айына 5852,63 теңгені құрайды (мемлекеттің жарналарын есептеу объектісінің 1,9%, яғни мемлекеттік статистика саласындағы уәкілетті орган айқындайтын ағымдағы қаржы жылының алдындағы екі жылға дейінгі орташа айлық жалақы).

Жеңілдік санаттарына кіретіндер:

1) балалар;

2) жұмыссыз ретінде тіркелген адамдар;

3) жұмыс істемейтін жүкті әйелдер;

4) бала (балалар) үш жасқа толғанға дейін оны (оларды) тәрбиелеп отырған жұмыс істемейтін адам (баланың заңды өкілдерінің бірі);

5)жүктілікке және босануға, жаңа туған баланы (балаларды) асырап алуға байланысты, бала (балалар) үш жасқа толғанға дейін оның (олардың) күтіміне байланысты демалыста жүрген адамдар;

6) мүгедектігі бар балаға күтім жасауды жүзеге асыратын жұмыс істемейтін адамдар;

7)бірінші топтағы мүгедектігі бар адамға күтім жасауды жүзеге асыратын жұмыс істемейтін адамдар;

8)зейнетақы төлемдерін алушылар, оның ішінде Ұлы Отан соғысының ардагерлері;

9)қылмыстық-атқару (пенитенциарлық) жүйесінің мекемелерінде (қауіпсіздігі барынша төмен мекемелерді қоспағанда) сот үкімі бойынша жазасын өтеп жатқан адамдар;

10)тергеу изоляторларындағы адамдар, сондай-ақ үйқамақ түріндегі бұлтартпау шарасы қолданылған жұмыс істемейтін адамдар;

11) жұмыс істемейтін қандастар;

12)"Алтын алқа", "Күміс алқа" алқаларымен наградталған немесе бұрын "Батыр ана" атағын алған, сондай-ақ I және II дәрежелі "Ана даңқы" ордендерімен наградталған көпбалалы аналар;

13) мүгедектігі бар адамдар;

14) орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында күндізгі оқу нысанында білім алып жатқан адамдар;

15) мемлекеттік атаулы әлеуметтік көмекті алушы жұмыс істемейтіндер үшін Қазақстан Республикасының бюджет заңнамасында айқындалатын тәртіппен ай сайын ағымдағы айдың алғашқы бес жұмыс күні ішінде төленеді.

-Жүйедегі мәртебені қалай анықтауға болады?

-Медициналық қызметтерді тұтынушының мәртебесін тексеру қызметі (сақтандырылған/ сақтандырылмаған) енді Қазақстан Халық банкі, ЦентрКредит Банкі және Kaspi Bank мобильді қосымшаларына енгізілді.

Әлеуметтік медициналық сақтандыру қоры МӘМС жүйесіндегі мәртебені тексерудің және соңғы 12 айдағы төлемдерді көрсетудің қолжетімді тәсілдерін кеңейту бойынша жұмыстар жүргізуде. Енді бұны кейбір екінші деңгейлі банктердің (ЕДБ) мобильді қосымшаларында жасауға болады.

Өткен 12 айға жасалған төлемдер мен мәртебені Халық банкінің қосымшасы арқылы тексеруге болады. Ол үшін Halyk мобильді қосымшасын орнатып, авторизациядан өтіп, «Мемлекеттік қызметтер» бөлімін таңдап, ізінше «МӘМС» бөлімшесінде ЖСН жазу керек. Halyk арқылы медициналық ұйымға тіркелгені туралы ақпарат қолжетімді. «Мемлекеттік қызметтерге» кіріп, «Анықтамалар» батырмасын басқан кезде тұрғылықты мекенжайы, емхананың атауы, тіркелген күні көрініп тұрады.

Өткен 12 айға жасалған төлемдер мен мәртебені ЦентрКредит Банкінің қосымшасы арқылы да білуге болады. BCC.KZ мобильді қосымшасын орнатқаннан кейін, авторизациядан өтіп, «Мемлекеттік қызметтер» бөлімін таңдап, ізінше «МӘМС туралы ақпарат» бөлімшесінде ЖСН жазу қажет.

Сондай-ақ Kaspi.kz мобильді қосымшасын орнатып, Kaspi Bank қосымшасында сақтандырылған мәртебесін тексеруге болады. Авторизациядан өткеннен кейін «Мемлекеттік қызметтер» бөліміне кіріп, ары қарай «МӘМС мәртебесін» таңдау керек.

Соңғы 12 ай ішінде төленбеген кезеңдер болса, оларды банк қосымшаларында төлеуге болады. Төлемдер тексерілгеннен кейін «САҚТАНДЫРЫЛҒАН» мәртебесі беріледі.

 - Жалпы, МӘМС жүйесіне облыстан қанша тұрғын қамтылып отыр?

 -«Әлеуметтік медициналық сақтандыру қоры» КЕАҚ Түркістан облысы бойынша филиалы «Сақтандыру» ақпараттық жүйесінен 2024 жылдың желтоқсан айында  жүктелген МӘМС жүйесінде сақтандырылмағандар тізіміне талдау жүргізу барсында өңірде 1 708 558 (83%) тұрғыны медициналық сақтандыру жүйесіне қатысу құқығына ие болған. Жалпы, медициналық ұйымдарға 2 062 854 тұрғын тіркелген.Ал, жүйедегі сақтандырылмағандар саны 354 296 (17%).

Түркістан облысы  бойынша  15 жеңілдік санаттар саны - 1 400 668 (68%). Оның ішінде, басым бөлігін он сегіз жасқа толмаған балалар құрап отыр 895 927.

 

Subscribe or follow our news on social networks
Error in the text? Please let us know. Highlight the error and press Ctrl + Enter

Last News

Yesterday
03 February
02 February
01 February
31 January