Қарағанды облысының жедел медициналық жәрдем қызметінің жұмысы: ішкі тынысымен танысу

«Әлеуметтік медициналық сақтандыру қоры» КЕАҚ Қарағанды облысы бойынша филиалының директоры Иран Шаметеков пен директордың орынбасары Ғұламжан Жуманов өңірдің жедел медициналық жәрдем қызметіне барды.

Облыстық жедел медициналық жәрдем станциясының басшысы Талғат Жүкен таныстыру экскурсиясын өткізіп, қызметтің жұмысын ұйымдастыру, құрылымы және негізгі бағыттары туралы жан-жақты ақпарат берді.

Сапар барысында қонақтар халықтан тәулік бойы шақыртулар қабылданып, өңделетін диспетчерлік қызметтің жұмысымен танысты. Сондай-ақ бригадалардың жұмысын үйлестіру және оларды шақырту орындарына жедел бағыттау тәртібі туралы мәлімет алды.

Бүгінде Қарағанды облысының жедел медициналық жәрдем қызметі — өңір тұрғындарына тәулік бойы шұғыл медициналық көмек көрсететін ауқымды жүйе.

Қызмет жұмысының негізгі көрсеткіштері:

• 100 жедел медициналық жәрдем бригадасы;

• 4 медициналық авиация бригадасы;

• тәулігіне 1 200-ден 1 700-ге дейін шақырту;

• 1 760 жұмыс орны.

Санитариялық автокөліктерді жарақтандыру мен жаңартуға да ерекше көңіл бөлінеді. Жедел медициналық жәрдем көліктері ауруханаға дейінгі кезеңде шұғыл медициналық көмек көрсетуге қажетті барлық құрал-жабдықтармен жабдықталған. Олардың құрамында заманауи медициналық құрылғылар, пациенттердің жағдайын бақылауға арналған аппаратура, шұғыл көмек көрсету құралдары және қажетті медициналық керек-жарақтар бар.

Бұл медициналық бригадаларға шақыртуларға жедел әрекет етуге, оқиға орнында білікті көмек көрсетуге және пациенттерді тасымалдау кезінде қажетті медициналық қолдау көрсетуге мүмкіндік береді.

2025–2026 жылдары өңірдің денсаулық сақтау жүйесі үшін 115 бірлік санитариялық автокөлік сатып алынды. Бұл материалдық-техникалық базаны нығайтуға және облыс тұрғындарына медициналық көмектің қолжетімділігін арттыруға бағытталған маңызды қадам болды.

Жедел жәрдем — бұл тек автокөліктер мен медициналық жабдықтар ғана емес. Бұл — тәулік бойы көмекке келуге және ең қымбат құндылық — адам өмірін сақтап қалуға дайын мамандар командасы! ❤️