Түркістан облыстық балалар ауруханасында міндетті әлеуметтік медициналық сақтандыру (МӘМС) жүйесі аясында күрделі диагноз қойылған 7 күндік нәрестеге жоғары технологиялық медициналық көмек көрсетіліп, жедел ота жасалды.
Нәрестеде омыртқаның даму ақауы мен мида сұйықтықтың жиналуы қатар анықталған. Дәрігерлер дер кезінде хирургиялық араласу жасап, баланың жағдайын тұрақтандыруға мүмкіндік алды.
Ота барысында заманауи нейромониторинг әдісі қолданылды. Бұл тәсіл операция кезінде жүйке жүйесінің қызметін үздіксіз бақылауға мүмкіндік беріп, ықтимал асқынулардың алдын алуға септігін тигізеді.
Жедел отаға тәжірибелі мамандар тобы қатысты. Атап айтқанда, нейрохирург Бегманов Т.А., неонаталдық хирург Бердікулова Ж.А. және неонаталдық реаниматолог Сапар Қ.У. бірлесіп, күрделі хирургиялық араласуды жоғары деңгейде орындады.
Мамандардың айтуынша, аталған патология нәрестеде антенаталдық кезеңде, яғни жүктілік барысында анықталмаған. Соған қарамастан, дәрігерлердің жедел әрі үйлесімді әрекетінің арқасында балаға дер кезінде қажетті медициналық көмек көрсетілді.
Айта кету керек, мұндай жоғары технологиялық операциялар МӘМС жүйесі аясында тұрғындар үшін қолжетімді. Бұл өз кезегінде күрделі диагнозы бар пациенттерге сапалы әрі уақытылы медициналық көмек алуға мүмкіндік береді.
Түркістан облыстық балалар ауруханасы өңірде жоғары технологиялық медициналық қызметтерді дамыту бағытында жүйелі жұмыс жүргізіп, күрделі клиникалық жағдайларда тиімді шешімдер ұсынып келеді.
