Жетісу облысында қару-жарақ пен оқ-дәрілер сақталған тағы бір орын анықталды
13 маусымда Сарқан қаласының маңында Жетісу облысы ПД ҰҚККБ жедел қызметкерлері мен ҰҚКД қызметкерлерінің күшімен қару-жарақ сақталған тықпа орын анықталды. Полиэтилен пакетке оралған атыс қаруы мен оқ-дәрілер «Сарқан-Екіаша» автожолының 5 шақырымында суармалы арықтан табылған.
«7 патронмен жарақтандырылған «Байкал» тапаншасы, бір ауызды аңшылық мылтығы, 12 калибрлі шолақ мылтық, маркасы белгіленбеген, сериялық нөмірлері жоқ газ тапаншасы, сондай-ақ әртүрлі калибрлі 105 патрон тәркіленді. 2022 жылы Талдықорған қаласында қаңтар оқиғасы кезінде «Байкал» тапаншасы ұрланғаны анықталды», – деп хабарлады Жетісу облысы ПД ҰҚККБ бастығы Сарқытбай Құсайынов.
Полицияда заңсыз сақталған қаруды, сондай-ақ оның негізгі (құрамдас) бөліктерін өз еркімен тапсырған азаматтар, егер олардың әрекеттерінде өзге де құқық бұзушылық құрамы болмаса, жауапкершіліктен босатылатынын еске салды.
