Түркістан облыстық балалар ауруханасында ҚР Денсаулық сақтау министрлігінің бас балалар нейрохирургі Г.Өлеңбайдың қатысуымен нейрохирургия бойынша шеберлік сабағы өтті. Іс-шара барысында Міндетті әлеуметтік медициналық сақтандыру (МӘМС) шеңберінде vagus-нейростимуляция (VNS) пульсгенераторын орнату отасы сәтті орындалды.
VNS – эпилепсияны хирургиялық емдеу әдісі, онда арнайы нейростимулятор құрылғысы кезеген жүйкеге (n. vagus) имплантацияланады. Бұл жүйе мидағы құрысу белсенділігін басуға мүмкіндік береді.
VNS орнатудың негізгі көрсеткіштері:
Рефрактерлі эпилепсия (2 және одан да көп дәрілік терапияға бағынбайтын түрлері)
Резективті нейрохирургияға кандидат бола алмайтын пациенттер
Жиі – генерализденген немесе фокалды ұстамалар, Леннокс–Гасто синдромы
4–5 жастан асқан балалар мен ересектерде қолдануға болады
Ота кезеңдері:
Жалпы анестезиямен мойында сол жақ кезеген жүйке ашылады. Электрод жүйкеге оралады.Нейростимулятор құрылғысы тері астына, кеуде тұсына орналастырылады.Электрод генератормен жалғанады. Отадан кейін құрылғының жұмысы арнайы бағдарламалағышпен реттеледі.
Бұл операция – жоғары технологиялық медициналық көмек түріне жатады және МӘМС пакетінде қарастырылған. Сондықтан сақтандырылған пациенттер үшін ол толықтай тегін жүргізіледі.
Мұндай заманауи әдістердің енгізілуі – еліміздегі балалар нейрохирургиясының дамуына және пациенттердің өмір сапасын жақсартуға маңызды қадам болып отыр.
