Аралда газ жабдығын заңсыз қоспақ болған екі адам жарылыстан зардап шекті
«QazaqGaz Aimaq» АҚ Қызылорда өндірістік филиалының хабарлауынша, Аудандық ішкі істер департаментінің аға кезекшісінен Қызылорда облысы Арал қаласындағы Бекетай би көшесінде газ жарылысы туралы қоңырау келіп түскен.
Болған оқиға салдарынан екі адам зардап шеккен. Олар шұғыл түрде Арал қалалық орталық ауруханасына жеткізілді. Қазіргі сәтте жағдайлары ауыр.
Алдын ала тексеріс нәтижесі бойынша, үй иесі қосымша газ жабдығын қосу үшін кездейсоқ адамдарды жалдаған. Тағы бір жабдықты газға қосуға рұқсаты да жоқ болып шықты.
Монтаж жұмыстары кезінде жалдаған адамдары қауіпсіздік шараларын сақтамай, жарылыс орын алған.
Істің анық-қанығын анықтаумен Арал аудандық полиция бөлімі айналысып жатыр. Оқыс оқиғаға байланысты техникалық сараптама жүргізілмек.
«QazaqGaz Aimaq» АҚ барлық тұтынушыларды газ жабдықтарын пайдалануда абай болуға шақырады.
Ережеге сай, газбен жабдықтау жүйесіне өз бетінше қосылу, газ жабдығын ауыстыру және жөндеу, қосымша жабдықты монтаждауға рұқсат етілмейді.
Газ жабдықтарын монтаждау мен орнатуды тек мамандар ғана орындауы тиіс!
