МӘМС - денсаулыққа деген жауапкершілікті арттырды

МӘМС жүйесі халыққа көптеген мүмкіндік алып келді. Әсіресе, мемлекет есебінен  әлеуметтік жағдайына байланысты халықты 15 жеңілдік санатқа бөліп, жүйеге қатыстыру оңтайлы әдіс болды. Яғни, тұрғындарға жаппай қымбат медициналық қызметтерді қолжетімді етті. Оның ішінде, КТ, МРТ, ангиография, туа бітті және жүрекке қатысты күрделі оталарды жасауға жағдай жасалды.

Сонымен қатар, емхана жұмысын бір жүйеге келтірді. Мәселен, учаскелік дәрігерде 2000-2500 адам болса, бүгінде 1700 адамға азайды. Нәтижесінде, учаскеде тіркелген науқастарға көрсетілетін қызмет сапасы жақсарды. Яғни, дәрігерлердің  науқастарды қабылдау барысында кезекті азайтуға септігін тигізеді.

Ең маңыздысы – МӘМС жүйесі Мемлекеттің, медициналық ұйымның және адамның денсаулыққа деген жауапкершілігін арттырды. Яғни, жұмыс берушінің жұмысшыға, медициналық ұйымның қызмет сапасын жақсартуға, адамның өз денсаулығына көңіл бөлуді мақсат етті.

Жұмсалатын шығындарға байланысты диагноздар жіктеліп, бөлінген қаржыны дұрыс жолға жұмсауға басымдық берілді. Мысалы, бұған дейін қаншама оталар жасалса да, қаржы көлемі бекітілген мөлшерден аспайтын. Бүгінде медициналық ұйымдарда жаңаша қызмет түрлері енгізіліп, қаржыландыру көлемі жылдан жылға артып келеді. Медициналық ұйымдарда бұрын-соңды жасалмаған оталар қолға алынды. Демек, жүйе медициналық ұйымның жұмыс істеу тәсілін өзгертті.  Аудан, қалаларда кездесе бермейтін лапароскопиялық хирургия күнделікті жұмысқа қолданылып жатыр. Бұл оталар тек облыс орталықтарында жасалатын еді.

Медицинада жоғары технологиялардың көмегімен жасалатын операциялар мен манипуляциялардың алатын орны ерекше.  Биылғы жылдың 9 айында Түркістан облысында осындай оталарға 642 213 932,95 теңге жұмсалды.

Күн сайын медициналық сақтандыру есебінен кардиохирургия, нейрохирургия, урология, травматология, онкология, хирургия, т.б. профильдер бойынша жүздеген операциялар жасалып жатыр. Осындай бір ғана отаның құны орташа алғанда бірнеше миллионды құрайды. Мысалы, 2023 жылдың 9 айында Түркістан облысында 1476 кардиохирургиялық операция жасалып, оған 1,8 млрд теңге төленген. Сонымен қатар, 1,3 млрд теңгеге 612 нейрохирургиялық ота жасалған.  Сонымен қатар 2 бүйрек алмастырылды, оның жалпы құны 9,7 млрд теңгені құрады.

Жалпы, бұл шаралар МӘМС жүйесінің есебінен жасалып жатыр. Яғни, сақтандырылған азаматтардың қалтасынан шығатын шығын едәуір қысқарып, осынша қызметті тегін пайдаланып отыр.

Атап өтерлігі, Түркістан облысында коронарлық артериясының шунттауы бойынша 5 операциясы жасалды. Бір операцияның құны 3,9 млн. теңге. Эндоваскулярлық  эмболизация немесе бас пен мойынның тамырлы окклюзиясы 40 операциясы өткізілді. Бір операцияның құны 6 млн. теңге. Кардиовертер мен дефибрилляторды имплантациялау 17 операция жасалды. Бір операцияның құны 9 млн. теңге. Айта кетерлігі, науқастарға құны 3,9 млн және 9 млн теңге аралығындағы қызметтер көрсетілді.

Бақыт Торғайбайұлы, “Әлеуметтік медициналық сақтандыру қоры“ КЕАҚ Түркістан облысы бойынша филиал директоры