МӘМС пакеті – азаматтардың өмір сапасын, ұлт саулығын жақсартуға бағытталған қызметтерден тұрады. Жалпы, МӘМС пакетінің ауқымы кең, оған тегін көмек пакетіне енбеген қызметтер кіреді. Жоспарлы стационарлық және стационарды алмастыратын көмек, КТ,МРТ сынды бағысы қымбат болып келетін консультативтік-дигностикалық көмектің барлық түрлері, оңалту және науқастың денсаулығын қалпына келтіруге бағытталған ем-дом түрлері де сақтандыру пакетіне енгізілген. Қарапайым халықтың қалтасы көтере бермейтін осындай қызмет түрлерін пайдалану үшін сақтандыру жүйесіне қатысқан дұрыс.
Жүйенің ең басты тиімді тұсы жеңілдік санаттарды мемлекет есебінен сақтандыру. Айта кетерлігі, он сегіз жасқа дейінгі балалар жүйеде сақтандырылған мәртебесін алып, қажетті медициналық көмектермен қамтамасыз етіледі.
Түркістан облысындағы тұрғындардың басым бөлігін он сегіз жасқа дейінгі балалар құрайды. Оның ішінде, 1,2 пайызы мүгедек балалар. Облыс бойынша балаларды оңалту орталықтарында 645 төсек-орын, оның ішінде, неврология, нейрохирургия, кардиология, кардиохирургия, ортопедия, травматологиялық және соматикалық науқастарға қызмет көрсетеді.
Өткен жылы облыста 16 774 бала оңалту емінен өтті. Яғни, балалардың ем шараларына медициналық сақтандыру жүйесі есебінен ақы төленді. Мүмкіндігі шектеулі балаларды оңалтуға арналған ұлттық жоба аясында ауқымды жұмыстар жасалып жатыр.
М.Байжұматова, «Жансая» облыстық балаларды оңалту орталығы басшының орынбасары, Түркістан облыстық денсаулық сақтау басқармасының штаттан тыс балалар реабилитологы.
