Тұрғындарға МӘМС шеңберінде алатын қызметтер түсіндірілді
Ескі Иқан ауылында медициналық сақтандыру қорының филиалы мен Сауран емханасының мамандары тұрғындарға ТМККК және МӘМС аясында қолжетімді медициналық қызметтер туралы түсіндірді. Мамандардың айтуынша, азаматтар профилактикалық тексерулерден бастап күрделі операцияларға дейінгі көптеген қызметті емханадан тегін немесе сақтандыру есебінен ала алады.
Тұрғындар тіркелген емханасын eGov.kz порталы немесе eGov Mobile қосымшасы арқылы тексере алады. Жыл сайын міндетті түрде дәрігерге дейінгі тексеруден өту қарастырылған. Әйелдер үшін алдын ала қаралу кабинеті жұмыс істейді, онда онкоцитология және профилактикалық тексерулер жүргізіледі.
Сонымен қатар, жүрек-қан тамырлары, онкологиялық және басқа да ауруларды ерте анықтауға мүмкіндік беретін скринингтер тегін жүргізіледі. 2025 жылдан бастап МӘМС пакеті кеңейіп, жүрек, асқорыту, бүйрек, эндокриндік жүйе, балалардың церебралды сал ауруы және басқа да диагноздар бойынша ем-шаралар қамтылады.
Реформалардың негізгі мақсаты — тұрғындарды сапалы және қолжетімді медицинамен қамтамасыз ету.
